बडादशैको अवसरमा झापाको ऐतिहासिक, धार्मिक एवं पर्यटकीय स्थल गरामनीको दुर्गा शक्ति पीठमा असोज २५ गते घटस्थापनादेखि ३१ गते सप्तमीसम्म श्री पद्म महापुराण ज्ञान महायज्ञ हुने भएको छ । बडादशैको अवसरमा अनादिकालदेखिको गरामनी शक्तिपीठमा विगत १५ वर्षदेखि पुराण लाग्दै आएको छ । गत वर्ष जेनजी आन्दोलनका कारण पुराण नलगाई चण्डी पाठ गरिएको थियो ।

असोज २५ गते घटस्थापनाका दिन शोभायात्रा र पुराण समुद्घाटन गरी सोही दिन पाठपारायण तथा कथा प्रारम्भ गरिने भएको छ । त्यस्तै असोज २६ गतेदेखि ३१ गतेसम्म बिहान ७ बजेबाट मण्डप पूजन , पाठ प्रारम्भ , बिहान १०.३० बजेदेखि दिउँसो ३.३० बजेसम्म कथा वाचन , बेलुका ६ बजेदेखि राति ९ बजेसम्म सन्ध्याकालीन महाआरती(गंगा आरती), भजन सन्ध्या हुने भएको छ । त्यस्तै असोज ३० गते लक्ष्यदीप प्रज्वलन र असोज ३१ गते यज्ञ समापन र तिलक प्रसाद वितरण गरिने दुर्गा शक्ति पीठ मन्दिर संरक्षण समिति तथा पुराण मूल आयोजक समितिका सचिव नवराज भट्टराईले बताए ।

जगद्गुरु बालसन्त मोहनशरण देवाचार्यले उद्घाटन गर्ने पुराणमा आचार्य पण्डित मुकुन्द नेपाल प्रमुख वाचक र आचार्य पण्डित मोहन घिमिरे उपवाचक रहने छन् । पुराण सम्पन्न गर्न विभिन्न उपसमितिहरू निर्माण गरिएको छ । मन्दिर समितिकी कार्यवाहक अध्यक्ष मनमाया शिवाकोटीको संयोजकत्वमा अतिथि सत्कार, चिरञ्जीवी कार्कीको संयोजकत्वमा आर्थिक , कौशिला सिटौलाको संयोजकत्वमा कीर्तन मण्डली तथा धार्मिक संघ संस्था , मोहन घिमिरेको संयोजकत्वमा गुरु , मण्डप तथा पूजापाठ , राजवंशी समाज विकास समितिको संयोजकत्वमा स्वयंसेवक र रोहत ओलीको संयोजकत्वमा प्रचारप्रसार, साउन्ड तथा टेन्ट उपसमिति गठन गरिएको छ ।

आजीवन सदस्य वृद्धि र अक्षयकोष निर्माण गर्ने उद्देश्य राखेर पुराण आयोजना गरिएको दुर्गा शक्ति पीठ मन्दिर संरक्षण समितिका सचिव भट्टराईले जानकारी दिएका छन् ।