हल्दीबारी ।  हल्दीबारी गाउँपालिका निवासी चम्लागाईं परिवारले आफ्ना स्वर्गीय बुबा टेकबहादुर चम्लागाईंको पुण्य स्मृति र आमा भोलादेवी चम्लागाईंको सम्मानमा स्थानीय दुई विद्यालयमा कुल ८ लाख रुपैयाँ बराबरको अक्षयकोष स्थापना गरेका छन्। ​

आफूहरूले अध्ययन गरेको विद्यालयको शैक्षिक विकास तथा भाइबहिनीहरूको पढाइमा सहयोग पुर्‍याउने उद्देश्यले पूर्व विद्यार्थी समेत रहेका पाँचै जना छोराछोरी—ज्ञानेन्द्रकुमार, फडेन्द्रकुमार, मुनादेवी (थापा), चम्पादेवी (ओली) र माया (थापा) चम्लागाईंको संयुक्त प्रयास तथा योगदानमा यी दुवै कोष स्थापना गरिएका हुन्। ​चम्लागाईं परिवारले हल्दीबारी माध्यमिक विद्यालयमा ५ लाख रुपैयाँको अक्षयकोष स्थापना गर्दै प्रधानाध्यापक टङ्कबहादुर पाख्रिनलाई सो रकम बराबरको चेक हस्तान्तरण गरेका छन्। यस कोषबाट प्राप्त हुने ब्याजमार्फत प्रत्येक वर्ष कक्षा ६ देखि १० सम्म अध्ययनरत नेपाली र अङ्ग्रेजी माध्यमका उत्कृष्ट १० जना विद्यार्थीलाई दामासाहीका दरले छात्रवृत्ति प्रदान गरिने विद्यालय प्रशासनले जनाएको छ।

 ​यसैगरी, हल्दीबारी–२ स्थित सरस्वती आधारभूत विद्यालयमा पनि पाँचै जना छोराछोरीको संयुक्त सहयोगमा ३ लाख रुपैयाँको अर्को अक्षयकोष खडा गरिएको छ। विद्यालयमा आयोजित विशेष कार्यक्रमका बीच छोराहरू पुगेर प्रधानाध्यापक गोविन्द बोहरालाई ३ लाख रुपैयाँको चेक हस्तान्तरण गरेका हुन्।

स्व. पिताले जीवनभर विद्यालयको शैक्षिक सुधारमा पुर्‍याएको योगदानको कदर गर्दै स्थापित यस कोषको ब्याजबाट प्रत्येक वर्ष कक्षा ६ देखि ८ सम्मका उत्कृष्ट ६ जना (प्रत्येक कक्षाका एक छात्र र एक छात्रा) विद्यार्थीलाई छात्रवृत्ति वितरण गरिनेछ। ​चेक हस्तान्तरण कार्यक्रममा परिवारका ज्येष्ठ सुपुत्र ज्ञानेन्द्रकुमार चम्लागाईंले आफूहरूले पढेको विद्यालयप्रति कृतज्ञता ज्ञापन गर्दै मातापिताको स्मृति र सम्मानलाई जीवन्त राख्न यो पहल गरिएको बताए। यता दुवै विद्यालयका प्रधानाध्यापकहरूले चम्लागाईं परिवारको यो प्रशंसनीय कार्यले स्थानीय शैक्षिक विकासमा ठूलो योगदान पुग्ने भन्दै धन्यवाद ज्ञापन गरेका छन्।