पश्चिम बंगालको वीरभूमस्थित प्रसिद्ध धार्मिकस्थल तारापीठको एक होटलमा भएको भीषण आगलागीमा परी एकै परिवारका पाँच जनाको मृत्यु भएको छ । मृतकहरू मेघालयको वेस्ट गारो हिल्सस्थित डालु चोइपानी निवासीका रहेको भारतीय सञ्चारमाध्यमले जनाएको छ । 

मृत्यु हुनेमा राजेन्द्र नाथ, उनकी श्रीमती आशा नाथ, बुरान मोदक तथा १० वर्षीय शिवराज मोदक र ८ वर्षीय औशनाथ मोदक रहेका छन् । उनीहरू मेघालयबाट तारापीठ दर्शनका लागि गएको समूहमा सहभागी थिए । सोमबार बिहानै तारापीठस्थित होटल बिदेशिनीमा अचानक भीषण आगलागी हुँदा नौ जनाको मृत्यु भएको बताइएको छ । मृतकमध्ये पाँच जना मेघालयबाट तीर्थयात्राका लागि पुगेको उक्त परिवारका सदस्य रहेका हुन् ।

घटनामा दुई बालबालिकासमेत ज्यान गुमाएपछि दुर्घटना थप हृदय विदारक बनेको छ । १० वर्षीय शिवराज र ८ वर्षीय औशनाथको समेत आगलागीमा मृत्यु भएको हो । मेघालयबाट तीर्थयात्राका लागि गएको समूहका अन्य छ जनालाई भने उद्धार गरिएको छ । उनीहरूलाई उपचारका लागि अस्पताल लगिएको जनाइएको छ । धार्मिक यात्राका क्रममा भएको यस दुःखद घटनाले मृतकका परिवार तथा आफन्तमा गहिरो शोक छाएको छ ।