२०८३ भाद्र ११ गते , विहीबार

मेची नेत्रालयमा मोतीबिन्दु भएका ५३ जनाको निःशुल्क शल्यक्रिया

पार्थ मण्डल

२०७८ फाल्गुन १५ गते , आईतबार

मेची नेत्रालयमा मोतीबिन्दु भएका ५३ जनाको निःशुल्क शल्यक्रिया

झापा । मोतीबिन्दु भएका ५३ जनाको दमक- ६ स्थित मेची नेत्रालयले निःशुल्क शल्यक्रिया गरेको छ । मातृका आई फाउन्डेसन काठमाडौँसँगको सहकार्यमा नेत्रालयले शनिवार दमक र आसपास क्षेत्रका बिरामीहरूको लागि निःशुल्क शल्यक्रिया गरेको हो ।

यसअघि नेत्रालयले निःशुल्क आँखा शिविर सञ्चालन गरेको थियो । नेत्रालयले दमक नगरपालिका ९, चुलाचुली गाउँपालिका इलामको १ र ६ नम्बर वडामा, कमल गाउँपालिका झापाको २, ३ र ६ नम्बर वडामा र शिवसताक्षी नगरपालिकाको ११ नम्बर वडामा आँखा शिविर सञ्चालन गरेको थियो । सो शिविरमा करिब १५ सय जनाले सेवा प्राप्त गरेका अस्पतालको भनाइ छ । शिविर सञ्चालनका क्रममा भेटिएको मोतीबिन्दु भएका ५३ जनाको शनिवार मेची नेत्रालय दमकमा शल्यक्रिया गरिएको हो ।

आँखाको पर्दा रोग विशेषज्ञ डा। शरदचन्द्र राई, डा। राजेश श्रेष्ठको टोलीसँगै मातृका आई फाउन्डेसनको प्राविधिक सहयोग रहेको थियो ।

मातृका आई फाउन्डेसन काठमाडौँको विशेष गरेर चस्मा÷कनट्याक्ट लेन्सहरू तत्काल र स्थायी रूपमा हटाउन लेजर आँखाको शल्यक्रिया प्रमुख सेवाको रुपमा रहेको छ । आधुनिक उपकरणहरू सहितको बाहिरी–बिरामी–उन्मुख सर्जिकल केन्द्र हो । सेवाहरूमा व्यापक आँखा समस्या अनुसन्धान, औषधि, थेरापी चस्मा÷कनट्याक्ट लेन्स र शल्यक्रियाहरू मार्फत उपचार समेत व्यवस्था रहेको छ ।

दमकमा नै पहिलो पटक अत्याधुनिक प्रविधिबाट बिना सिलाइ आँखाको पर्दा सम्बन्धी सम्पूर्ण सेवाहरू मेची नेत्रालयले १ वर्षअघिदेखि सुरु गरिसकेको छ । आँखाको जटिल उपचार मानिने आँखाको पर्दा (रेटिना) सम्बन्धी सेवा अत्याधुनिक प्रविधिबाट सिलाई नगरी शल्यक्रिया गरी दमकमा पहिलो पटक सुरु भएको हो ।

आँखा भित्र एउटा लेन्स हुन्छ । यो लेन्सले क्यामराको लेन्सको जस्तै प्रकाशको किरणलाई केन्द्रित गर्ने काम गर्छ, जसले गर्दा तपाईँ देख्न सक्नु हुन्छ । यो लेन्स, तपाईँ जवान हुँदा पारदर्शी र रङ विहीन हुन्छ, तर जब तपाईँ बुढो हुँदै जानुहुन्छ, यो लेन्स धमिलो र पहेँलो हुँदै जान्छ । तपाईँको लेन्सको धमिलोपनलाई मोतीबिन्दु भनिन्छ । समय बित्दै जाँदा, मोतिविन्दुले तपाईँको दृष्टि अझ धमिलो बनाउँछ र तपाईँको आँखा प्रकाशको ज्योतिसँग संवेदनशील हुँदै जान्छ ।